# Yasna — Chapter 35to42

*Exported from [Holy-Writings.com](https://www.holy-writings.com/) on 2026-06-19 — 1 clipping.*

---

> Source: Avesta.org. The Yasna, Chapter 35to42, translation: L.H. Mills / J. Darmesteter (Sacred Books of the East, 1880-1887), Avesta.org. License: Public domain (translation predates 1928).
> ──────────────────────────────────────────────────────────────────────
> 
> AVESTA: YASNA 35-42: Yasna Haptanghaiti
> 
> Avesta -- Zoroastrian Archives
> 
> Contents
> 
> Prev
> 
> Part 6 (Ha 35-42)
> 
> Next
> 
> English
> 
> AVESTA: YASNA - Yasna Haptanghaiti
> 
> Based on edition of Karl F. Geldner, Avesta, the Sacred
> Books of the Parsis, Stuttgart, 1896.
> 
> Chapter 35.
> 
> (zôt,)
> 1
> ahurem mazdãm ashavanem ashahe ratûm ýazamaide,
> ameshâ speñtâ huxshathrâ hudhånghô
> ýazamaide, vîspãm ashaonô stîm
> ýazamaide mainyevîmcâ gaêthyãmcâ
> berejâ vanghêush ashahe berejâ daênayå
> vanghuyå mâzdayasnôish. (râspî,)
> (ahurem ... mâzdayasnôish (2).)
> 2
> (zôt,) humatanãm hûxtanãm hvarshtanãm
> yadacâ anyadacâ verezyamnanãmcâ vâverezananãmcâ
> mahî aibî-jaretârô naênaêstârô
> ýathanâ vohunãm mahî! (humatanãm
> ... mahî (2)!)
> 3
> tat at vairîmaidî ahuramazdâ ashâ
> srîrâ hyat î mainimadicâ vaocôimâcâ
> verezimâcâ ýâ hâtãm shyaothananãm
> vahishtâ h'yât ubôibyâ ahubyâ.
> 4
> gavôi adâish tâish shyaothanâish ýâish
> vahishtâish fraêshyâmahî râmâcâ
> vâstremcâ dazdyâi surunvatascâ asurunvatascâ
> xshayañtascâ axshayañtascâ.
> 5
> huxshathrôtemâi bât xshathrem ahmat hyat
> aibî dademahicâ cîshmahicâ hvãmahicâ
> hyat mazdâi ahurâi ashâicâ vahishtâi.
> (huxshathrôtemâi ... vahishtâi (3).)
> 6
> ýathâ ât utâ nâ-vâ nâirî-vâ
> vaêdâ haithîm athâ hat vohû tat
> êeâdû verezyôtûcâ ît
> ahmâi fracâ vâtôyôtû ît
> aêibyô ýôi ît athâ verezyãn
> ýathâ ît astî.
> 7
> ahurahyâ-zî at vê mazdå ýasnemcâ
> vahmemcâ vahishtem amêhmaidî gêushcâ
> vâstrem, tat at vê verezyâmahî fracâ
> vâtêyâmahî ýâ-tê isâmaidê.
> 8
> ashahyâ âat sairî ashahyâ verezênê
> kahmâicît hâtãm jîjishãm
> dà vahishtãm âdâ ubôibyâ
> ahubyâ! (ashahyâ ... ahubyâ (2)!)
> 9
> imâ ât uxdhâ vacå ahuramazdâ
> ashem manyâ vahehyâ fravaocâmâ, thwãm
> at aêshãm paityâstâremcâ fradaxshtâremcâ
> dademaidê.
> 10
> ashâatcâ hacâ vanghêushcâ mananghô
> vanghêushcâ xshathrât staotâish thwât
> ahurâ staotôibyô aibî uxdhâ thwât
> uxdhôibyô ýasnâ thwât ýasnôibyô.
> ýenghê hâtãm ... tåscâ ýazamaide
> (2)!!
> 
> YASNA - Chapter 36.
> 
> 1
> ahyâ thwâ âthrô verezênâ
> paouruyê pairî-jasâmaidê mazdâ ahurâ
> thwâ thwâ mainyû spênishtâ ýê
> â axtish ahmâi ýêm axtôyôi
> dånghê.
> 2
> urvâzishtô hvô nå ýâtâyâ
> paitî-jamyå âtare mazdå ahurahyâ
> urvâzishtahyâ urvâzyâ nãmishtahyâ
> nemanghâ-nå mazishtâi ýånghãm
> paitî jamyå.
> 3
> âtarsh vôi mazdå ahurahyâ ahî
> mainyush vôi ahyâ spênishtô ahî
> hyat vâ-tôi nâmanãm vâzishtem âtare
> mazdå ahurahyâ tâ-thwâ pairijasâmaidê.
> 4
> vohû thwâ mananghâ vohû thwâ
> ashâ vanghuyå thwâ cistôish shyaothanâishcâ
> vacêbîshcâ pairijasâmaidê.
> 5
> nemah'yâmahî ishûidyâmahî thwâ
> mazdâ ahurâ, vîspâish thwâ humatâish
> vîspâish hûxtâish vîspâish
> hvarshtâish pairijasâmaidê.
> 6
> sraêshtãm at tôi kehrpêm kehrpãm
> âvaêdayamahî mazdâ ahurâ imâ
> raocå barezishtem barezimanãm avat ýât
> hvarê avâcî. ýenghê hâtãm
> ... tåscâ ýazamaide!!
> 
> YASNA - Chapter 37.
> 
> 1
> ithâ ât ýazamaidê ahurem mazdãm
> ýê gãmcâ ashemcâ dât apascâ
> dât urvaråscâ vanguhîsh raocåscâ
> dât bûmîmcâ vîspâcâ
> vohû.
> 2
> ahyâ xshathrâcâ mazênâcâ
> havapanghâishcâ têm at ýasnanãm
> paurvatâtâ ýazamaidê ýôi
> gêush hacâ shyeiñtî.
> 3
> têm at âhûiryâ nâmênî
> mazdâ-varâ speñtôtêmâ ýazamaidê,
> têm ahmâkâish azdibîshcâ ushtânâishcâ
> ýazamaidê, têm ashâunãm fravashîsh
> narãmcâ nâirinãmcâ ýazamaidê.
> 4
> ashem at vahishtem ýazamaidê hyat sraêshtem
> hyat speñtem ameshem hyat raocôñnghvat hyat
> vîspâ vohû.
> 5
> vohucâ manô ýazamaidê vohucâ
> xshathrem vanguhîmcâ daênãm vanguhîmcâ
> fseratûm vanguhîmcâ ârmaitîm. ýenghê
> hâtãm ... tåscâ ýazamaide!!
> 
> YASNA - Chapter 38.
> 
> 1
> imãm âat zãm genâbîsh hathrâ
> ýazamaidê ýâ-nå baraitî
> ýåscâ tôi genå ahuramazdâ
> ashât hacâ vairyå tå ýazamaidê.
> 2
> îzhå ýaoshtayô ferashtayô ârmatayô
> vanguhîm âbîsh ashîm vanguhîm îshem
> vanguhîm âzûitîm vanguhîm frasastîm
> vanguhîm parêñdîm ýazamaidê.
> 3
> apô at ýazamaidê maêkaiñtîshcâ
> hêbvaiñtîshcâ fravazanghô ahurânîsh
> ahurahyâ havapanghå huperethwåscâ vå
> hvôkhzhathåscâ hûshnâthråscâ
> ubôibyâ ahubyâ cagemâ.
> 4
> ûitî ýâ vê vanguhîsh
> ahurô mazdå nâmã dadât vanghudå
> hyat vå dadât tâish vå ýazamaidê
> tâish fryãnmahî tâish nemah'yâmahî
> tâish ishûidyâmahî.
> 5
> apascâ vå azîshcâ vå mâterãshcâ
> vå agenyå drigudâyanghô vîspô-paitîsh
> avaocâmâ vahishtå sraêshtå avâ
> vê vanguhîsh râtôish daregô-bâzâush
> nâshû paitî-vyâdå paitî-sêñdå
> mâtarô jîtayô. ýenghê hâtãm
> ... tåscâ ýazamaide!!
> 
> YASNA - Chapter 39.
> 
> 1
> ithâ ât ýazamaidê gêush urvânemcâ
> tashânemcâ ahmâkêñg âat urunô
> pasukanãmcâ ýôi nå jîjisheñtî
> ýaêibyascâ tôi â ýaêcâ
> aêibyô â dà anghen.
> 2
> daitikanãmcâ aidyûnãm hyat urunô
> ýazamaidê, ashâunãm âat urunô
> ýazamaidê kudô-zâtanãmcît
> narãmcâ nâirinãmcâ ýaêshãm
> vahehîsh daênå vanaiñtî vâ
> vêñghen vâ vaonarê vâ.
> 3
> ât ithâ ýazamaidê vanghûshcâ
> ît vanguhîshcâ ît speñtêñg
> ameshêñg ýavaêjyô ýavaêsvô
> ýôi vanghêush â-mananghô shyeiñtî
> ýåscâ ûitî.
> 4
> ýathâ tû-î ahuramazdâ mêñghâcâ
> vaocascâ dåscâ vareshcâ ýâ
> vohû athâ tôi dademahî athâ cîshmahî
> athâ thwâ âish ýazamaidê athâ
> nemah'yâmahî athâ ishûidyâmahî
> thwâ mazdâ ahurâ. (ýathâ tû-î
> ... mazdâ ahurâ (2).)
> 5
> vanghêush hvaêtêush hvaêtâtâ
> vanghêush ashahyâ thwâ pairijasâmaidê
> vanghuyå feseratvô vanghuyå ârmatôish.
> ýenghê hâtãm ... tåscâ ýazamaide
> (2)!!
> 
> YASNA - Chapter 40.
> 
> 1
> âhû at paitî adâhû mazdâ
> ahurâ mazdãmcâ bûiricâ kereshvâ
> râitî tôi xrapaitî ahmat hyat aibî,
> hyat mîzhdem mavaêthem fradadâthâ daênâbyô
> mazdâ ahurâ
> 2
> ahyâ hvô nê dâidî ahmâicâ
> ahuyê manah'yâicâ tat ahyâ ýâ
> tat upâ-jamyâmâ tavacâ huxemâ ashah'yâcâ
> vîspâi ýavê.
> 3
> dâidî at nerãsh mazdâ ahurâ
> ashâunô ashacinanghô aidyûsh vâstryêñg
> daregâi îzhyâi bezvaitê haxmainê
> ahmaibyâ ahmâ-rafenanghô.
> 4
> athâ hvaêtûsh athâ verezênâ
> athâ haxêmã h'yât ýâish
> hishcamaidê athâ vê utâ h'yâmâ
> mazdâ ahurâ ashavanô ereshyâ ishtêm
> râitî. ýenghê hâtãm ...
> tåscâ ýazamaide!!
> 
> YASNA - Chapter 41.
> 
> 1
> stûtô garô vahmêñg ahurâi
> mazdâi ashâicâ vahishtâi dademahicâ
> cîshmahicâ âcâ âvaêdayamahî.
> 2
> vohû xshathrem tôi mazdâ ahurâ apaêmâ
> vîspâ ýavê, huxshathrastû-nê
> nâ-vâ nâirî-vâ xshaêtâ
> ubôyô anghvô hâtãm hudâstemâ.
> 3
> humâîm thwâ îzhîm ýazatem
> ashanghâcim dademaidê, athâ tû-nê
> gayascâ asteñtåscâ h'yå ubôyô
> anghvô hâtãm hudâstemâ. (humâîm
> thwâ îzhîm ... hudâstemâ (2).)
> 4
> hanaêmâcâ zaêmâcâ mazdâ
> ahurâ thwahmî rafenahî daregâyâu
> aêshâcâ thwâ êmavañtascâ
> buyamâ, rapôishcâ tû-nê daregemcâ
> ushtâcâ hâtãm hudâstemâ.
> 5
> thwôi staotarascâ mãthranascâ ahuramazdâ
> aogemadaêcâ usmahicâ vîsâmadaêcâ,
> hyat mîzhdem mavaêthem fradadâthâ daênâbyô
> mazdâ ahurâ, (thwôi staotarascâ ... mazdâ
> ahurâ (2),)
> 6
> ahyâ hvô-nê dâidî ahmâicâ
> ahuyê manah'yâicâ tat ahyâ ýâ
> tat upâ-jamyâmâ tavacâ sarem ashah'yâcâ
> vîspâi ýavê.
> 7
> ýenghê hâtãm ... tåscâ
> ýazamaide (2). humatanãm ... vohunãm mahî
> (2). (râspî,) ýathâ ahû vairyô
> ... (4). ashem vohû ... (3).
> 8
> ýasnem sûrem haptanghâitîm ashavanem
> ashahe ratûm ýazamaide. ýenghê hâtãm
> ... tåscâ ýazamaide!!
> 
> YASNA - Chapter 42. (Appendix to Yasna Haptanhaiti)
> 
> (zôt u râspî,)
> 1
> ýazamaidê vê ameshâ speñtâ
> ýasnahê haptanghâtôish hañdâtâ,
> apãmcâ xå ýazamaidê apãmcâ
> peretûsh ýazamaidê, pathãmcâ vîcaranå
> ýazamaidê pathãmcâ hañjamanå
> ýazamaidê,
> 2
> gairîshcâ afshtacinô ýazamaidê
> vairîshcâ awezhdânånghô ýazamaidê,
> aspenâcâ ýevînô ýazamaidê
> pâyûshcâ thwôreshtârâ ýazamaidê,
> mazdãmcâ zarathushtremcâ ýazamaidê.
> 3
> zãmcâ asmanemcâ ýazamaidê,
> vâtemcâ darshîm mazdadâtem ýazamaidê
> taêremcâ haraithyå berezô ýazamaidê,
> dà bûmîmcâ vîspâcâ
> vohû ýazamaidê.
> 4
> manô vohû urunascâ ashâunãm
> ýazamaidê, vâsîmcâ ýãm
> pañcâ-sadvarãm ýazamaidê, xaremcâ
> ýim ashavanem ýazamaidê ýô hishtaitê
> maidim zrayanghô vourukashahê, zarayô vourukashem
> ýazamaidê.
> 5
> haomemcâ zâirîm berezañtem ýazamaidê,
> haomem frâshmîm frâdat-gaêthem ýazamaidê,
> haomem dûraoshem ýazamaidê.
> 6
> apãmcâ feraxshaostrem ýazamaidê
> vayãmcâ ferafraothrem ýazamaidê, athaurunãmcâ
> paitî-ajãthrem ýazamaidê ýôi
> yeyã dûrât ashô-îshô dah'yunãm,
> vîspãscâ ameshã speñtã
> ýazamaidê. ýenghê hâtãm
> ... tåscâ ýazamaide!!!
> 
> Avesta -- Zoroastrian Archives
> 
> Contents
> 
> Prev
> 
> Part 6 (Ha 35-42)
> 
> Next
> 
> English
>
> — *Yasna — Chapter 35to42 — L.H. Mills / James Darmesteter (1880-1887) (Public domain (Sacred Books of the East, 1880-1887))*