# Dīpaṃkarabhadra: Guhyasamājamaṇḍalavidhi

*Exported from [Holy-Writings.com](https://www.holy-writings.com/) on 2026-06-20 — 1 clipping.*

---

> Source: GRETIL (gretil.sub.uni-goettingen.de) — Sanskrit academic edition. Title: Dīpaṃkarabhadra: Guhyasamājamaṇḍalavidhi. Data entry: (see source file). License: refer to source file header.
> ──────────────────────────────────────────────────────────────────────
> 
> This file is a plain text transformation of http://gretil.sub.uni-goettingen.de/gretil/corpustei/sa_dIpaMkarabhadra-guhyasamAjamaNDalavidhi.xml
>   with a rudimentary header. For a more extensive header please refer to the source file.
> 
> ## Data entry: S. Klein-Schwind
> ## Contribution: S. Klein-Schwind
> ## Date of this version: 2020-07-31
> 
> ## Source:
>    - : MS Niedersäsische Staats- und Universitätsbibliothek Göttingen, Cod. ms. sanscr. 257 Additional References: Dhīḥ 42 (2006:109-154).
> 
> ## Publisher: Göttingen Register of Electronic Texts in Indian Languages (GRETIL), SUB Göttingen
> 
> ## Licence:
>    This e-text was provided to GRETIL in good faith that no copyright rights have been infringed. If anyone wishes to assert copyright over this file, please contact the GRETIL management at gretil(at)sub(dot)uni-goettingen(dot)de. The file will be immediately removed pending resolution of the claim.
>    Distributed under a Creative Commons Attribution-NonCommercial-ShareAlike 4.0 International License.
> 
> ## Structure of references:
>    A reference is assembled consisting of
>    - a pragmatic abbreviation of the title: Guhyasamājamaṇḍalavidhi = ,
>    - the number of the  in arabic numerals,
>    - the number of the verse in arabic numerals.
> 
> ## Notes:
>    This file has been created by mass conversion of GRETIL's Sanskrit corpus from dipguhsu.htm. Due to the heterogeneity of the sources the header markup might be suboptimal. For the sake of transparency the header of the legacy file is documented in the note element below:
> 
> 	 Dipamkarabhadra: Guhyasamajamandalavidhi
> Based on: MS Niedersächsische Staats- und Universitätsbibliothek Göttingen, Cod. ms. sanscr. 257
> Additional References: Dhīḥ 42 (2006:109-154)
> Copyright: S. Klein-Schwind 2008
> Input by: S. Klein-Schwind,
> proof-read and revised by: H. Isaacson
> Released: 18 February 2008
> Revision: 1.0
> Distributor: Centre for Tantric Studies, Hamburg (tantric-studies.org)
> 
> ## Revisions:
>    - 2020-07-31: TEI encoding by mass conversion of GRETIL's Sanskrit corpus
> 
> # Text
> 
> dīpaṃkarabhadra's guhyasamājamaṇḍalavidhi
> 
> namo vajrasattvāya ||
> 
> jñeyādyāvṛtinirmuktaṃ jñānādarśādisaṃyutam |
> mañjuśrīguhyasaccakraṃ natvā tad vacmī matsmṛtau || 1
> 
> śrīmatsamājasannītyā cakrāmnātakramād ataḥ |
> udakādyam anujñāntaṃ yo 'bhiṣikto guros tataḥ || 2
> 
> tattvāptau guhyacakre 'smin guhyaprajñābhiṣekataḥ |
> guhyajño yogatattvajñas triyānasandhitattvavit || 3
> 
> vidyāhṛnmantramudrāṇāṃ samādhitritayasya ca |
> sāmānyetarasiddhīnāṃ tantranītyā vibhāgavit || 4
> 
> samayasaṃvarastho vā prajñāyogasutatparaḥ |
> mantratantraprayogajño bhavyaḥ sattvārthasādhane || 5
> 
> yogadhairyādiyukto 'pi proktair guṇair ananvitaḥ |
> sattvārthe naiva bhavyo yat sadbhis taiḥ syur guṇā hy amī || 6
> 
> kṛpāvān suvrato jāpī śrāddho gambhīratattvavit |
> pūrvasevāṃ svacakrasthaḥ kṛtvā maṇḍalam ālikhet || 7
> 
> kvacin mano'nuge sthāne digdhe saccandanādibhiḥ |
> sugandhikusumākīrṇe prāk praatar viniveśya ca || 8
> 
> vimokṣamukhasaṃśuddhau hṛdīndau maṃ prabhojjvalam |
> dhyātvā śubhābhivṛddhyarthaṃ prakuryād deśanādikam || 9
> 
> sarvadiktryadhvasaṃbhūtabuddhānāṃ purataḥ sthitaḥ |
> hṛdprabhodbhavarūpādyaiḥ pūjāṃ kṛtvā vidhānataḥ || 10
> 
> svāsatsaṃkalpamātrotthaṃ tryadhvajaṃ duṣkṛtaṃ kṛtaṃ |
> svapnasvapnādivat sarvaṃ triṣkṛtya deśayāmy aham || 11
> 
> saṃbuddhasatsutāryāṇām anyeṣāṃ yac cubhaṃ śubham |
> niḥśeṣam anumodyāhaṃ saṃbodhau nāmayāmy anu || 12
> 
> yāce 'haṃ sarvabuddhānāṃ sarvāśāśvāsadāyikā |
> deśanākāśasaṃsthānāṃ bhātu loke 'khile 'naghā || 13
> 
> śuddhaniḥśeṣasaṃkalpān pratyātmānandavedinaḥ | sambuddhān śaraṇaṃ yāmi svaparārthaphalapradān 14
> 
> satsattvāśeṣasaddharmam āgamādhigamātmakam |
> satsampadāśrayācintyaṃ śaraṇaṃ samupaimy aham || 15
> 
> prāptāśvāsam avaivartyaṃ niṣyandādiphalair yutam |
> guhyābhiṣekajaṃ caiva gato 'smi śaraṇaṃ gaṇam || 16
> 
> munīndrasūnusanmārgaṃ caryānantāgrabodhakam |
> sarvabuddhātmasadbuddhyā samāśrito 'smy ato 'dhunā || 17
> 
> sarvāvṛtisamudghātyanantajñānāmṛtāspadam |
> bhramidṛṣṭiprabodhāya bodhau sarvaṃ dadhe manaḥ || 18
> 
> bodhicittāc ca buddhatvaṃ phalahetor asaṅgataḥ |
> pratyātmavedyadharmatvāc chūnyajñānātmako hy aham || 19
> 
> oṃ śūnyatājñānavajrasvabhāvātmako 'ham |
> 
> hūṅkāraṃ cāpy athoṣṇīṣān śāśvatādikam eva ca ||
> rakṣārthaṃ krodhacakrastho dhyāyād vighnān pramardayan || 20
> dharmadhātuṃ tato dhyāyāt tryaśraṃ śuklordhvasaṃsthita |
> dikcakravarticitrābhaṃ antaḥkhādho'bjavajragam || 21
> 
> tatra bhrūṅkāracakrotthasavidyaśāśvatodbhavam |
> spharadbuddhaughakhavyāpi caturaśrādisaṃyutam || 22
> 
> śaśisūryasamākrāntaṃ viśvābjadevatāsanam |
> vibhaktāśeṣasadratnaṃ kūṭāgāraṃ prabhāvayet || 23
> 
> svaralakṣaṇasaṃyuktaṃ kādivyañjanaraśmikam |
> madhyacandrāsane cittaṃ jñānacandraṃ vibhāvya tat || 24
> 
> tatrādyahṛdbhavaṃ vajraṃ raktam ādyahṛdā yutam |
> kṛtajinābhadehyarthas tadahaṅkṛtimān svayam || 25
> 
> sphatikendvaṅgamūlāsyaṃ nīlasavyetarāruṇam |
> sarvākāravarodāraṃ sadguṇābharaṇāmbaram || 26
> 
> dvibhujāśliṣṭasatprajñaṃ vajraparyaṅkasusthiram |
> vajrakhaḍgabhujaṃ savye vāme sanmaṇipadminam || 27
> 
> prajñopāyātmakaṃ śrimaj jagatsampatsamāśrayam |
> samantabhadram ātmanaṃ bhāvayet spharaṇatviṣam || 28
> 
> mahārāgavineyaṃ tal lokam ālokya bhājanaṃ |
> suratadhvaninā svāntar jinavṛndaṃ niveśayet || 29
> 
> tal locanādisadvidyā rūpādiviṣayātmabhiḥ |
> protsṛjya navadhā devīḥ svavidyāntar niveśayet || 30
> 
> svayoṣitpadmakarkaṭyāṃ suratodbhavamaṇḍalam |
> nirmāyātra jagat kṛtsnam āśvāsāya praveśayet || 31
> 
> khavyāpibuddhasanmitraiḥ svavajrāntardravodbhavaiḥ |
> sevayed avivartyarthaṃ tattvajñānaphalāptaye || 32
> 
> āśvastaṃ taj jagad dṛṣṭvā bījaiś cātaḥ svabhāvajaiḥ |
> utsṛjet sarvasattvāṃś ca jagaccittātmabhāvajān || 33
> 
> kṣitigarbhādikān ṣaṭkāṃś cakṣurādisvabhāvakān |
> kṣiṃ jraṃ khaṃ gaṃ skaṃ ity ebhiḥ saṃ-bījāc ca yathākramam || 34
> 
> rūpavajrādikān ṣaṭkān bāhyādhyātmasvabhāvajān |
> jaḥ hūṃ vaṃ hoḥ khaṃ ity etai raṃ-bījāc ca bahiḥ sthitān ||35
> 
> locanādyās tu tā vidyāḥ pṛthivyādisvabhāvajān |
> lāṃ māṃ pāṃ tām iti tv ebhir jagaddharmātmatattvajāḥ || 36
> 
> śāśvatādyāṃs tu saṃbuddhān rūpādiskandhasvabhāvajān |
> buṃ-āṃ-jrīṃ-bhiś ca khaṃ-hūṃ-bhyāṃ sarvadharmān samutsṛjet || 37
> 
> oṃ āḥ hūṃ iti tac cittaṃ bhāsvaddhorbhyāṃ vidarbhitam |
> guhyapadmodarāntasthaṃ mṛduniṣyandaśuddhaye || 38
> 
> te ca rāgāgnisaṃdīpte kāyadvayadravīkṛte |
> sanmitrābhātadigdevīgītyā dhyāyāt sucodanāḥ || 39
> 
> tvaṃ vajracitta bhuvaneśvara sattvadhāto trāyāhi māṃ ratimanojñā mahārthakāmaiḥ |
> kamāhi māṃ janaka sarvamahāgrabandho yadīcchase jīvitu mahya nātha || 40
> 
> tvaṃ vajrakāya bahusattvapriyājñacakra buddhārthabodhiparamārthahitānudarśī |
> rāgeṇa rāgasamayāṃ mama kāmayasva yadīcchase jīvitu mahya nātha || 41
> 
> tvaṃ vajravāca sakalasya hitānukampī lokārthakāryakaraṇe sadā saṃpravṛtta |
> kāmahi māṃ suratacarya samantabhadra yadīcchase jīvitu mahya nātha || 42
> 
> tvaṃ vajrakāma samayāgra mahāhitārtha sambuddhavaṃśatilakaḥ samatānukampī |
> kāmāhi māṃ guṇanidhiṃ bahuratnabhūtāṃ yadīcchase jīvitu mahya nātha || 43
> 
> utthāpanyanurodhāt tad dravaṃ paśyan vipattivat |
> māyāvad vastu saṃcintya svamantrārthaḥ punar bhavet || 44
> 
> kuṅkūmākāramūlāsyo nīlasavyasitetaraḥ |
> kumārābharaṇākāraḥ prajñānandaikasundaraḥ || 45
> 
> dvibhujāśliṣṭasatprajñaḥ svābhaprajñādharāsyadhṛk |
> bhāsvatkṛpāṇasadbāṇanīlotpaladhanuḥkaraḥ || 46
> 
> spharadbuddhaughanirmāṇaniṣpāditajagattrayaḥ |
> svabījodbhavacihnotthamañjuvajraḥ svayaṃ bhavet || 47
> 
> bhavasaṅgād bhavo' nantaḥ śamasaṅgo vipattibhāk |
> māyayā kṛtasaṃsevo dharmadhātvātmako bhavet || 48
> 
> oṃ dharmadhātusvabhāvātmako 'ham ||
> 
> sanmitraiḥ kṛtaniṣyandaḥ pākāt sarvajñatām iyāt |
> taccakṣurādyadhiṣṭhānam upasādhanam iṣyate || 49
> 
> kṣitīśakuliśākāśalokeśaskāmbhabhadrakaiḥ |
> saṃpūrya cakṣurādīni tadbījaiḥ pauruṣaṃ vahet || 50
> 
> dharmasaṃbhoganirmāṇavāhinī jagadarthatā |
> cittaguhyādyadhiṣṭhānaṃ sādhanārtham ato bhavet || 51
> 
> svahṛtkaṇṭhaśiraścandre hūṃ-āḥ-oṃ-jāṃś ca satprabhūn |
> vajrābjacakramadhyasthān dhyātvā cittādiguhyakān || 52
> 
> taddhṛtprajñāṅgasaṅgārcīrūpavajrādiraśmibhiḥ |
> saṃpūjya sarvadiktryadhvavyāptāśeṣavināyakān || 53
> 
> kṛtārthasaṃpadāṃ teṣāṃ ye hṛtkaṇṭhaśirogatāḥ |
> cittavajrādayas tāṃs tu tadadhiṣṭhāne prayācayet || 54
> 
> cittavajradharaḥ śrīmāṃs trivajrābhedyabhāvitaḥ |
> adhiṣṭhānapadaṃ me 'dya karotu cittavajriṇaḥ ||55
> 
> daśadiksaṃsthitā buddhās trivajrābhedyabhāvitāḥ |
> adhiṣṭhānapadaṃ me 'dya kurvantu cittavajriṇaḥ ||56
> 
> oṃ sarvatathāgatacittavajrasvabhāvātmako 'ham ||
> 
> dharmo vai vākpathaḥ śrīmāṃs trivajrābhedyabhāvitaḥ |
> adhiṣṭhānapadaṃ me 'dya karotu vāgvajriṇaḥ ||57
> 
> daśadiksaṃsthitā buddhās trivajrābhedyabhāvitāḥ |
> adhiṣṭhānapadaṃ me 'dya kurvantu vāgvajriṇaḥ ||58
> 
> oṃ sarvatathāgatavāgvajrasvabhāvātmako 'ham ||
> 
> kāyavajradharaḥ śrīmāṃs trivajrābhedyabhāvitaḥ |
> adhiṣṭhānapadaṃ me 'dya karotu kāyavajriṇaḥ || 59
> 
> daśadiksaṃsthitā buddhās trivajrābhedyabhāvitāḥ |
> adhiṣṭhānapadaṃ me 'dya kurvantu kāyavajriṇaḥ || 60
> 
> oṃ sarvatathāgatakāyavajrasvabhāvātmako 'ham ||
> 
> ṣoḍaśānusmṛteḥ śuddhau kurvantīti taduktavān |
> tasya cittādyadhiṣṭhānaṃ noktam aprastutoktitaḥ || 61
> 
> triguhyālakṣaṇaṃ vīkṣya māyāprajñāṅgasaṅgataḥ |
> mṛduvaimalyasaṃśuddhau mahāsādhanam iṣyate || 62
> 
> saṃcodya diggatān nāthān jñānasattvahṛdarciṣā |
> tatprabhodbhavavidyābhir bhṛtakumbhāmṛtāmbubhiḥ || 63
> 
> svabhiṣiktaḥ prabhuḥ śrīmān kuleśamakuṭottamaḥ |
> niṣyandādyais tathā madhyaiḥ svābhāṃ prajñāṃ viśodhayet || 64
> 
> śirohṛnnābhiguhye 'syāś caraṇānte ca pratyaṇūn |
> oṃ-hūṃ-svā-hṛdbhiḥ āḥ-hābhyāṃ śāśvatādikulātmakaiḥ ||32 65
> 
> āpūrya pañcasaṃbuddhaiḥ hūṃ-āḥ-aṣṭadalābjikām |
> saṃviśodhya tayā buddhān hūṃ-sadvajro 'nurāgayet || 66
> 
> oṃ sarvatathāgatānurāgaṇavajrasvabhāvātmako 'ham ||
> 
> hṛccandrakhadgahṛdbhābhiḥ khavyāpibuddhamaṇḍalam |
> niveśyātmani saccittarūpam vajrābjasaṃsthitam || 67
> 
> nijacakraṃ svabījena tatrotpādya sthirīkṛtam |
> utsṛjed vidhinānena jagatsv ajñānaśuddhaye || 68
> 
> saṃcodyādhipam akṣobhyaṃ mahādveśārthakṛjjinam |
> vajradhṛg iti cotsṛjyāṅgendranīlamaṇiprabham || 69
> 
> sitasavyetarāraktam paramādyabhujānvitam |
> saṃhṛtyātmani sacchrīmān sarvabhāvair niveśayet || 70
> 
> jinajig iti cādyābhaṃ mahāmohārthakṛdvibhum |
> saccakrādyanvitaṃ tadvad dhyāyāt pūrvendumaṇḍale || 71
> 
> ratnadhṛg iti ratneśaṃ suvarṇābhaṃ samodyamam |
> sadratnādyanvitaṃ nāthaṃ kumārāsyaṃ tu dakṣiṇe || 72
> 
> ārolig iti vāgīśaṃ mahārāgārthakṛtprabhum |
> padmarāgābhapadmādyāṃ kumārāsyaṃ tu pṛṣṭhataḥ || 73
> 
> prajñādhṛg ity amogheśaṃ mahogrerṣyārthakṛtkhajam |
> vaidūryābhaṃ kumārāsyaṃ dhyāyāt khaḍgādyam uttare || 74
> 
> sajaṭāmukuṭāḥ sarve svavidyādvayasangiṇaḥ |
> sarvābharaṇasadvastrā dhyeyāḥ padmārkamaṇḍale || 75
> 
> moharatīti cāgneyāṃ kṛpopāyajanārthadā |
> kāyeśavatsvarūpā syāl locanā svendumaṇḍale || 76
> 
> dveṣaratīti nairṛtyāṃ maitrīpraṇidhikāmadā |
> citteśavadratautsukyā māmakī candramaṇḍale || 77
> 
> rāgaratīti vāyavyāṃ modabalasamādhidā |
> vāgīśābhārthaśuddhā sā pāṇḍarā candramaṇḍale || 78
> 
> vajraratīti caiṣānyām upekṣajñānasādhikā |
> ratneśavatsvarūpā syāc candre tārā manoramā || 79
> 
> cakraṃ raktotpalaṃ divyaṃ paṅkajaṃ pītaṃ utpalam |
> śiṣṭaṃ svādhipavad diṣṭaṃ cihnam āsāṃ kramād ataḥ || 80
> 
> āgneyādicatuḥkoṇe pūrvadvāradvipārśvayoḥ |
> rūpādyā darpaṇādyaiḥ syuḥ kāyādyābhās tritattvataḥ || 81
> 
> prāgdvāre krodhaparyaṅkaś citteśākārabhāsuraḥ |
> yamāntakṛd itītighnaḥ skandhajñeyavināśataḥ || 82
> 
> kāyeśābhogradṛg bhīmo 'vāgdvāre 'parājitaḥ |
> prajñāntakṛd itīcchāghnaḥ svātmadṛkkleśahānitaḥ || 83
> 
> mṛtyujanmāghasāṃ ghātī pṛṣṭhadvāre 'śvakandharaḥ |
> padmāntakṛd itīcchāghno vāgīśābhograghūrṇitaḥ || 84
> 
> akṣobhyābhogravighnaghna uttare 'mṛtakuṇḍaliḥ |
> vighnāntakṛd iti dvārakriyāsurāriśuddhitaḥ || 85
> 
> bhrūbhaṅgordhvajvalatkeśababhrubhrūśmaśrulocanāḥ |
> vyāvṛtāśyā lalajjihvāḥ sadaṃṣṭrotkaṭahāsinaḥ || 86
> 
> caṇḍamudgaradaṇḍābjasvavajrādikarās tv amī |
> krūrabhujaṅgabhūṣāṅgāḥ svābhavidyāṅgasaṅginaḥ || 87
> 
> niṣpannaṃ cakram ālokya nijabhāvena sarvataḥ |
> hṛdbījābhāṅkuśair buddhāṃś cakrākārasamāhṛtān || 88
> 
> dṛṣṭvā vighnān svavighnaghnaiḥ samutsāryābhirakṣya ca |
> dattvārghaṃ mantrasaṃjaptaṃ candrādikusumānvitam || 89
> 
> cakre niveśya tac cakraṃ cakṣuḥkāyādyadhiṣṭhitam |
> prāgvat siktaṃ ca tad dhyāyān niṣyandādyadhimātrataḥ || 90
> 
> buddhānāṃ makuṭe 'kṣobhyaḥ śeṣāḥ svādhipasekinaḥ |
> kāyeśākṣobhyavāgīśacitteśair dvāriṇo matāḥ || 91
> 
> ity āsicya svahṛdbhābhiḥ prajñābjāntarniveśitam |
> rūpādyaṃ romakūpotthaṃ rūpavajrādiraśmibhiḥ || 92
> 
> kūṭāgāraprabhonmuktair gaganāntaḥprasarpibhiḥ |
> sampūjya svaṃ munīndrāṃś ca pūjyapūjātmako bhavet || 93
> 
> oṃ sarvatathāgatapūjāvajrasvabhāvātmako 'ham ||
> 
> sarvadharmaiḥ stuyāc cakraṃ saṃbuddhasvātmamūrtibhiḥ |
> pañcajñānāni mudrābhiḥ śatapañcakulaṃ trikam || 94
> 
> akṣobhyavajra mahājñāna vajradhātu mahābudha |
> trimaṇḍala trivajrāgra ghoṣavajra namo 'stu te || 95
> 
> vairocana mahāśuddha vajraśānta mahārate |
> prakṛtiprabhāsvarāgrāgrya deśavajra namo 'stu te || 96
> 
> ratnarāja sugāmbhīrya khavajrākāśanirmala |
> svabhāvaśuddha nirlepa kāyavajra namo 'stu te || 97
> 
> vajrāmita mahārāja nirvikalpa khavajradhṛk |
> rāgapāramitāprāpta bhāṣavajra namo 'stu te || 98
> 
> amoghavajra saṃbuddha sarvāśāparipūraka |
> śuddhasvabhāvasaṃbhūta vajrasattva namo 'stu te || 99
> 
> candrārkavāribhaiṣajyagandhaṃ vāyvagnicakragam |
> praṇavādhiṣṭhitaṃ sārcis tritattvair abhimantritam || 100
> 
> hūṃnyastavajrasajjihvo dhyātvā jñānāmṛtair bhṛtam |
> hṛccandrāntargatāśeṣacakraṃ tena pratarpayet || 101
> 
> hṛdraśminirmitair nāthaiḥ svāsatsaṃkalpavarjitaiḥ |
> buddhātmakaṃ jagat kṛtvā hṛdbījāntar niveśayet || 102
> 
> hṛccihnavaraṭāntasthaṃ candrahṛdbindurūpakam |
> prabhāsvat svamano dhyātvā jñānasattvaṃ prabhāsayet || 103
> 
> cittavākkāyavajraṃ ca prabodhya raśmimālayā |
> niviṣṭāṃ hṛdi tāṃ dhyāyāt svajñānāmṛtavāhinīm || 104
> 
> antas tanum ataḥ sarvāṃ tayābhāsya samantataḥ |
> pratiromaprabhāvyūhair jagadarthaṃ prapūrayan || 105
> 
> dhyātvā sūkṣmaṃ svacihnaṃ vā vidyānāsāgrasaṃsthitam |
> municakraṃ svasaṃvedyaṃ satprajñāsaṅgabhāsvaram || 106
> 
> dṛṣtvā sthairyanimittaṃ tu spharaṇaṃ tadraśminimittaiḥ |
> buddhair nānāvidhaiś cihnair vidadhīta punaḥ punaḥ || 107
> 
> kāyavākcittasadvajrāt pañcasajjñānaraśmikam |
> spharanmantraṃ japaṃ kuryād yugapat kramaśo 'thavā || 108
> 
> vajrābjadharmataccakraṃ kāyavākcittavajragam |
> nilayaṃ tad dṛḍhīkurvañ jñānakāyaṃ spharañ japet || 109
> 
> uccārayet spharan prāṇair mantram āyāmasaṃhṛtam |
> kāyādisphārasaṃhāraiḥ kuryāj jāpaṃ kramākramāt || 110
> 
> uccāryaivaṃ viyad vyāpya kāyādyais taiḥ svaraśmibhiḥ |
> prāgvat saccittapūjārhaṃ prāṇād vidyaugham utsṛjan || 111
> 
> parigūḍhollasadvidyāsukhāveśavaśīkṛtam |
> āyāmājñānabuddhaughaṃ svātmany ante niveśayet || 112
> 
> niṣyandādyadhimokṣaiś ca bindusūkṣmatriguhyajāḥ |
> dhyeyā mṛdvādibhir bhedair yogāḥ sevādivat tathā || 113
> 
> svahṛttattvaparāmarṣāt parīttacittasaṃsṛteḥ |
> locanādigaṇodgītaiś cakram abhyarthya pūjayet || 114
> 
> mūrdhnīndupraṇavārdrāṃ tu sacittavārivāhinīm |
> vidhivat pātayan kuryāt kāyavākcittaprīṇanam || 115
> 
> viśramyaivaṃ japaṃ kṛtvā kṛtapūjādiko budhaḥ |
> tritattvātmāhitān buddhān gatasaṅgo visarjayet ||54 116
> 
> evaṃ tattvadṛśā muktaṃ jagat kṛtsnaṃ vilokya ca |
> praṇidhim āmukhīkuryāt kṛpayā taddhitāya ca || 117
> 
> samādhitaḥ samutthāya garvaṃ patyuḥ samudvahan |
> cāragatas tu saṃbuddhaviṣayaiḥ saṃprapūjayet || 118
> 
> śrīmañjuvajrasarvātmā svabhāvaviṣayānugān |
> viṣayān bhāvayann evaṃ svasvaśuddhyā pratiṣṭhitān || 119
> 
> śāśvatādisvabhāvāṃs tān pratyātmadharmasaṃsthitān |
> śrīmadvajradharākārān śuddhasattvasamanvitaḥ || 120
> 
> sarvaṃ saṃpādayet kṛtyaṃ svāsatsaṃkalpavarjitaḥ |
> saccakrānantapūjeyaṃ sadāmeyā suyoginaḥ || 121
> 
> svahṛccandre svacakreśaṃ nijabījaiḥ svabhojanam |
> samālambya svahṛttattvaiḥ sarvabuddhāmṛtatāyitam || 122
> 
> sarvadharmatayā śuddhaṃ tritattvair abhimantritam |
> svādhidaivatasaccakraṃ prīṇayaṃs tena pūjayet || 123
> 
> homo bāhyo 'numeyo 'yaṃ cittamātrāt tu mānasaḥ |
> anuttaras tv ayaṃ jñānāgniskandhendhanadāhataḥ || 124
> 
> kāmair evaṃ samastaiḥ svaṃ svadaivātmasvabhāvajam |
> parāṃś ca pūjayed evaṃ samayaḥ sugatair mataḥ || 125
> 
> tat tat kāyādi yat karma sarvabuddhāṃs tu pūjayan |
> anurūpaṃ jagat kāryaṃ kuryān nityaṃ samāhitaḥ || 126
> 
> yat kāyavāṅmayaṃ karma mudrāmantrātmakaṃ mahat |
> tat tat karma samāsādya sarvabuddhāṃs tu pūjayet || 127
> 
> vastuny ekatra saṃkalpā nānākārāvabhāsinaḥ |
> muktiduḥkhasukhotpādāḥ karmāśeṣā bhavanti yat || 128
> 
> tasmāc chubhāśubhaṃ karma kāyādyaṃ kalpanodbhavam |
> sarvasatkalpanirmukte jñāne tatkalpanā katham || 129
> 
> amoghavajrasaccakrī samayotthāpanāya tu |
> hṛtkarmavajrakhaṃ dhyātvā sarvaśuddhyābhiṣecayet || 130
> 
> gurvavajñādike doṣe sadānaṃ bhojyam āvahet |
> bāhyasnānaṃ svacakrasthaḥ kuryāt sekavidhānataḥ || 131
> 
> sandhyāntare 'pi pūjādi japaṃ kṛtvā tu pūrvavat |
> hṛdyantargatasaccakraḥ supyāt prajñākṛpānvitaḥ || 132
> 
> utthānasamaye śrīmān devīsaṃgīticoditaḥ |
> prātar utthāya prāgvat tu saṃjaped ādikarmikaḥ || 133
> 
> mantrasīlavratair yuktaś cakṣuḥkāyādyadhiṣṭhitaḥ |
> jñāne kiñcitsamāveśī japet sandhyāsv atandritaḥ || 134
> 
> sarvākārasuniṣpannaṃ spharatsamhārakārakaṃ |
> prāptajñānavaśī kiñcid aniśaṃ yogam āśrayet || 135
> 
> samyagjñānavaśī dhyāyan kuryāt kāryaṃ jagaddhitam |
> dhātvaṇvantas trisaccakraiḥ pratibimbātmamūrtibhiḥ || 136
> 
> saṃsiddhāv asakṛl labdhvā yogī nimittam eva tu |
> tritattvāṃ vidhivat pūjāṃ kṛtvā maṇḍalam ālikhet || 137
> 
> cakrastho vidhivaj japtvā svayaṃ vādhyeṣito 'pi vā |
> parārthaṃ ghaṭamāno 'pi nimittaṃ prāpya saṃlikhet || 138
> 
> cakrimantraṃ japel lakṣaṃ lakṣam vā svādhidaivatam |
> anyeṣām ayutaṃ samyak cakriṇāṃ vājñayā likhet || 139
> 
> tritattvair garbhitotsargān anyān hṛdbījagarbhitān |
> sānusvārādyavarṇāṃs tu nāmno mantrān samuddharet || 140
> 
> kāyavākcittaguhyākhyā karmadharmamahātmikā |
> triguhyā samayā mudrā bījaṃ hṛdayam ucyate || 141
> 
> karmakartrī tu vidyoktā śāntyādipraticodanāt |
> mālāmantrāś ca vidyoktā sarvathā tāṃ japet budhaḥ || 142
> 
> yathāyogaṃ japaṃ kṛtvā labdhvājñāṃ svādhipāditaḥ |
> nirodhacakram ābhujya svacittaśuddhito likhet || 143
> 
> vighnān utsārya saṃkīlyābhyukṣya kṣmāṃ prārthya yācayet |
> samādhitritayaṃ kṛtvā buddhādīn adhivāsya ca || 144
> 
> dattvā balyargham āpūjya homair āpyāyya khe nyaset |
> khānayet kṣmāṃ sunirvighnāṃ gartāpūre 'pi ayaṃ kramaḥ || 145
> 
> ācīrṇapūrvasaṃsevo mañjuvajrātmayogavān |
> saṃskṛtya maṇḍalasthānaṃ saṃhāryaiḥ pūjayānvitaḥ || 146
> 
> vighnāricakrayogasthaḥ svābhiṣekaṃ samādadhet | duṣṭān nikṛntayed evaṃ yogād vā svādhidaivatāt | 147
> 
> oṃ bhūḥ kham iti mantreṇa viyadbhūtāṃ vasundharām |
> hūṃ laṃ hūṃ iti vajrātma kṣmāṃ kṛtvā tām adhiṣṭhayet || 148
> 
> oṃ medini vajrībhava vajrabandha hūm ||
> 
> prāgvad vighnaghnayogātmā sevādyantānurāgaṇaḥ |
> ādiyogī svacakraṃ tu protsṛjyāntāmṛtaś ca saḥ || 149
> 
> cakrarājāgriyogātmā cakrakarmasukarmakṛt |
> karmarājāgriyogīti samādhitrayam uttamam || 150
> 
> etadyogastha ācāryaḥ sarvabuddhātmamūrtikaḥ |
> svabhāvaśuddhavajrātmā cakrabhūmadhyasaṃsthitaḥ || 151
> 
> vajraghaṇṭādharo vīro 'dhyeṣyas tricakranirmitau |
> sahāyair vajraghaṇṭāgraiḥ śāśvatādyātmamūrtibhiḥ || 152
> 
> sarvatāthāgataṃ śāntaṃ sarvatāthāgatālayam |
> sarvadharmāgranairātmyaṃ deśa maṇḍalam uttamam || 153
> 
> sarvalakṣaṇasaṃpūrṇaṃ sarvālakṣaṇavarjitam |
> samantabhadrakāyāgraṃ bhāṣa maṇḍalam uttamam || 154
> 
> śāntadharmāgrasaṃbhūtaṃ jñānacaryāviśodhakam |
> samantabhadravācāgraṃ bhāṣa maṇḍalam uttamam || 155
> 
> sarvasattvamahācittaṃ śuddhaṃ prakṛtinirmalam |
> samantabhadracittāgryaṃ ghoṣa maṇḍalasārathe || 156
> 
> vīkṣyāto mañjurāḍ kruddhaḥ sattvadhātuṃ tamiśritam |
> hūṃ vajrottiṣṭheti svakṣaś cakram utkṣipya nirmitam || 157
> 
> maṭkāracandraśūryākṣaḥ sarvādhvadikṣu dīpayan |
> jagad ālokayan dhīmāṃś cakrabhūmau parikramet || 158
> 
> pādatalajvaladvajro vajrollālanatatparaḥ |
> līlāvajrapadaṃ nṛtyan sadaṃṣṭrotkaṭa-hūṃ-kṛtaḥ || 159
> 
> protsārayet praduṣṭaughān devādyān vighnamaṇḍalān |
> śṛṇvantu sarvavighnaughāḥ kāyavākcittasaṃsthitāḥ || 160
> 
> ahaṃ mañjuravaḥ śrīmān rakṣācakraprayojakaḥ |
> vajreṇādīptavapuṣā sphālayāmi trikāyajān || 161
> laṅghayed me viśīryetātra nānyathā |93bhūmeḥ parigrahaṃ kṛtvā nirvighnāya prakīlayet | 162
> oṃ gha gha ghātaya 2 sarvaduṣṭān phaṭ kīlaya 2 sarvapāpān phaṭ hūṃ hūṃ hūṃ vajrakīla vajradharo ājñāpayati sarvaduṣṭakāyavākcittavajraṃ kīlaya hūṃ phaṭ ||
> 
> adhaḥśūlordhvavighnāriṃ dhiyā madhye prakīlayet |
> vighnaughān ghātayet sarvān daśadiksaṃvyavasthitān || 163
> 
> saṃvīkṣya kṣmāṃ sunirvighnāṃ tīkṣṇajvālākulaprabhām |
> sīmāprākāradigbandhān dhiyā kṛtvādhivāsayet || 164
> 
> tvaṃ devi sākṣibhūtāsi sarvabuddhānāṃ tāyinām |
> caryānayaviśeṣeṣu bhūmipāramītāsu ca || 165
> 
> yathā mārabalaṃ bhagnaṃ śākyasiṃhena tāyinā |
> tathā mārabalaṃ jitvā maṇḍalaṃ lelikhāmy aham || 166
> 
> kṣmāṃ saṃlipya sugandhadyaiś citraiḥ puṣpaiḥ prakīrya ca |
> candrādyaiś cakriṇāṃ sthāne prakuryān maṇḍalaṃ budhaḥ || 167
> 
> tatrāvāhya tu saccakraṃ kṛtvā sīmādibandhanam |
> pūjāstutyāmṛtāsvādaṃ kalaśān adhivāsayet || 168
> 
> vastrācchāditasadgrīvāṃś cūtādipallavānvitān |
> kalaśān māṇḍaleyānāṃ tanmantrair adhivāsayet || 169
> 
> pañcavrīhyauṣadhīratnagandhāmbucakrasaṃcayam |
> śragbaddhavajramūrdhānaṃ cakreśena japaṃ japet || 170
> 
> arghaṃ dattvā samāpūjya prakṣipya sitapuṣpakam |
> dhūpādhivāsitaṃ tatra sadgandhādyabjabhājanam || 171
> 
> pratidinaṃ trisandhyāsu baliṃ dattvā tathā japet |
> te ca cakrabahiṣkoṇe jayaś cakreśasavyataḥ || 172
> 
> tebhyo 'rghabhājane toyaṃ kṣiptvā tenābhiṣecanāt |
> ātmanaḥ sarvaśiṣyāṇāṃ jalābhiṣecanaṃ bhavet || 173
> 
> cakrapūjāṃ punaḥ kṛtvā dhūpam utkṣipya pāṇinā |
> cakreśaṃ prārthayed dhīmān buddhāṃś ca jānusaṃsthitaḥ || 174
> 
> bhagavan mañjusadvajra vidyārāja namo 'stu te |
> icchāmi likhituṃ nātha maṇḍalaṃ karuṇātmaka || 175
> 
> śiṣyāṇām anukampāyai yuṣmākaṃ pūjanāya ca |
> tan me bhaktasya bhagavan prasādaṃ kartum arhasi || 176
> 
> samanvāharantu māṃ buddhā jagaccakrakriyārthadāḥ |
> phalasthā bodhisattvāś ca yāś cānyā mantradevatāḥ || 177
> 
> devatā lokapālāś ca bhūtāḥ sambodhiśāsitāḥ |
> śāsanābhiratāḥ sattvā ye kecid vajracakṣuṣaḥ || 178
> 
> amuko 'haṃ mahāvajrī mañjuśryudayamaṇḍalam |
> likhiṣyāmi jagacchuddhyai yathāśaktyupacārataḥ || 179
> 
> anukampām upādāya saśiṣyasya tu tan mama |
> maṇḍale sahitāḥ sarve sāṃnidhyaṃ kartum arhatha || 180
> 
> nimantryaivaṃ trivārāṃs tān kṛtvā pūjādikaṃ vibhoḥ |
> samārakṣya bahir gatvā svaśiṣyān srakkaragrahān || 181
> 
> manīṣiṇo mahotsāhān kṛtajñanirahaṅkṛtān |
> kulino guṇinaḥ śrāddhān rūpavarṇavayonvitān || 182
> 
> arthinaś cābhiyuktāṃś ca saugatān mantrasādhane |
> virūpān nirguṇāṃś cāpi hīnān apy adhivāsayet || 183
> 
> caturṇām apy anujñātaḥ parṣadāṃ maṇḍale vidhiḥ |
> śikṣāsu svāsu yuktānāṃ mahāyānaratātmanām || 184
> 
> mantrasiddhyarthinaḥ kecit praviśantīha maṇḍale |
> puṇyakāmās tato 'nye ca paralokārthino 'pare || 185
> 
> paralokaṃ samuddiṣya śraddhāṃ kṛtvā ca bhūyasīm |
> praviśen maṇḍalaṃ dhīmān naihikam phalam īhayet || 186
> 
> aihikaṃ kāṅkṣamāṇasya na tathā pāralaukikam |
> paralokārthinaḥ puṃsaḥ puṣkalaṃ tv aihikaṃ phalam || 187
> 
> evam uktvā tu tān śiṣyān dhiyā svāntar niveśitān |
> prāgvad vajrābjasaṃśuddhān iha dvāre tu yācayet || 188
> 
> tvam me śāstā mahārata icchāmy ahaṃ mahānātha mahābodhinayaṃ dṛḍham || 189
> 
> dehi me samayaṃ tattvaṃ bodhicittaṃ ca dehi me | buddhaṃ dharmaṃ ca saṃghaṃ ca dehi me śaraṇatrayam praveśayasva māṃ nātha mahāmokṣapuraṃ varam | 190
> 
> trir uccārya ca tān śiṣyān jñātvā sadbhaktivatsalān |
> pradhānaṃ śiṣyam ekaṃ tu kṛtvā brūyād idaṃ vacaḥ || 191
> 
> ehi vatsa mahāyānaṃ mantracaryānayaṃ vidhim |
> deśayiṣyāmi te samyak bhājanas tvaṃ mahānaye || 192
> 
> buddhās triyadhvasaṃbhūtāḥ kāyavākcittavajriṇaḥ |
> saṃprāptā jñānam atulaṃ vajramantraprabhāvanaiḥ || 193
> 
> mantraprayogam atulaṃ yena bhagnaṃ mahābalam |
> mārasainyaṃ mahāghoraṃ sākyasiṃhādibhir varaiḥ || 194
> 
> lokānuvṛttim āgamya cakraṃ pravartya nirvṛtāḥ |
> tasmān matim imāṃ vatsa kuru sarvajñatāptaye || 195
> 
> deśanādiṃs tridhālāpyā bodhicittaṃ tato guruḥ |
> utpādayed anutpannam utpannaṃ smārayet punaḥ || 196
> 
> sarvakarmakṛtārakṣya dhyāyād dhṛtkaṇṭhamūrdhasu |
> vajraṃ abjaṃ tathā cakraṃ hūṃ āḥ oṃ teṣu vinyaset || 197
> 
> gandhāmbuvajrasanmuṣṭyā hūṃ oṃ āḥ evaṃ āpaṭhan |
> hṛcchiraḥkaṇṭham ālabhya dadyāt puṣpādikaṃ kramāt || 198
> 
> puṣpaṃ mūrdhni puro dhūpaṃ dīpaṃ gandhaṃ punar hṛdi |
> dadyāt sarvakṛtā japtaṃ śiṣyebhyo yatir ādarāt || 199
> 
> dvādaśāṅgulapuṣpāgram akīṭāpāṭitāvraṇam |
> aśvatthodumburāvakraṃ pradadyād dantadhāvanam || 200
> 
> prāgudaṅmukhasaṃsthais taiḥ khādayitvaiva prakṣipet |
> gocarmamātrabhūlipte siddhiṃ śāntyādikāṃ diśet || 201
> 
> ācamya tricalupānaṃ dattvā bāhye niveśya ca |
> kuśān śayyopadhānāya bāhusūtraiḥ surakṣayet || 202
> 
> tricalupānamantraḥ ||
> 
> oṃ hrīḥ viśuddhadharma sarvapāpāni cāsya śodhaya sarvavikalpān apanaya hūm ||
> 
> sarvajñānāṃ kadā loke sambhavo jāyate na vā |
> udumbarasyeva kusumaṃ kadācit karhicid bhavet || 203
> 
> tato 'pi durlabhotpādo mantracaryānayasya hi |
> yena sattvārtham atulaṃ kartuṃ śaktā hy anirvṛtāḥ || 204
> 
> anekakalpakoṭībhir yat kṛṭam pāpakam purā |
> tat sarvaṃ hi kṣayaṃ yāti dṛṣṭvā maṇḍalam īdṛśaṃ || 205
> 
> kim utānantayaśasāṃ mantracaryānaye sthitaḥ |
> padaṃ hy anuttaraṃ yāti japan vai mantra tāyinām || 206
> 
> ucchinnā durgatis teṣāṃ sarvaduḥkhasya sambhavā |
> yeṣāṃ caryāvare hy asmin matir atyantanirmalā || 207
> 
> adya yuṣmābhir atulā lābhā labdhā mahātmabhiḥ |
> yena yūyaṃ jinaiḥ sarvaiḥ saputrair iha śāsane || 208
> 
> sarve parigṛhītā stha jāyamānā mahātmabhiḥ |
> tena yūyaṃ mahāyāne śvo jātā hi bhaviṣyatha || 209
> 
> eṣa mārgavaraḥ śrīmān mahāyānamahodayaḥ |
> yena yūyaṃ gamiṣyanto bhaviṣyatha tathāgatāḥ || 210
> 
> kṛtvātha deśanāṃ rakṣāṃ svāpayet kuśasaṃstare |
> yat kiñcit paśyatha svapne prātar me kathayiṣyatha || 211
> 
> rakṣādhiṣṭhādikaṃ kṛtvā taj japet sārvakarmikam |
> pañcakulatricakrāṇāṃ kuṇḍaliḥ sārvakarmikaḥ || 212
> 
> pṛṣṭvā śubhāśubhaṃ svapnaṃ hatvā kuṇḍalināśubham |
> śiṣyān saṃrakṣya tān yogyān saṃvaraṃ grāhayet tataḥ || 213
> 
> cakre 'vaivartyasaṃsekaṃ dattvā nātha vadasva me |
> cakradevatayos tattvam ācāryaparikarma ca || 214
> 
> samayaṃ sarvabuddhānāṃ saṃvaraṃ guhyam uttaram |
> ācāryaḥ syām ahaṃ nityaṃ sarvasattvārthakāraṇāt || 215
> 
> ācāryatārthinaḥ śiṣyān grāhayitvā tu saṃvaram |
> yogam ādhāya saccakraṃ saṃpūjya khe dhiyā nyaset || 216
> 
> śāśvatādisvarūpābhaṃ tadvarṇabījasaṃbhavam |
> pañcajñānānvitaṃ sūtraṃ pañcaviṃśatibheditam || 217
> 
> yaḥkārasūryacandrākṣo mañjuvajrātmavigrahaḥ |
> dīptadṛṣṭyaṅkuśākṛṣtaṃ svavarṇāntar niveśitam || 218
> 
> vairocanādihṛjjñānasūtraṃ sarvakṛtā saha |
> prayaccha śāśvata sūtraṃ svacakrasūtraṇāya ca || 219
> 
> tritattvagarbhitaṃ caiva yāvad akṣobhyam arthayan |
> anyonyānugatāḥ sarvadharmā ityādy anusmaran || 220
> 
> cakradviguṇato dīrghaṃ dvāraviṃśatibhāgikam |
> pañcāmṛtasugandhena temayitvāpi rakṣitaṃ || 221
> 
> tryakṣarāntargataṃ yogī cālayet sūtradhāriṇā |
> trir jjaḥkārais tam āpreṣya jjaḥ jjaḥ jjaḥ ity api svayaṃ punaḥ || 222
> 
> vāmamuṣṭigraho nābhau pratīcyavāgdiśi sthitaḥ |
> khasūtraṃ pātayec chrīmāṃs tathaivādhaḥ prasūtrayet || 223
> 
> oṃ vajrasamayasūtraṃ mātikrama hūṃ ||
> 
> sattvārthe bhavatāṃ kālo viyadvyāpitathāgatān |
> codayet sūtradhvaninā tad ihāgamanāya tu || 224
> 
> yakṣapretendranāgeśadiṅmukho 'gnyanilāśritaḥ |
> prākpratīcyuttarāvākcaturdigbahiḥ prasūtrya ca || 225
> 
> koṇasūtraṃ samāsūtrya cāgneyanairṛtisthitaḥ |
> prākpratīcyuttarāvāgdik tathaivāṣṭakamaṇḍalam || 226
> 
> dviguṇīkṛtya tat sūtraṃ cakramadhye vidhārya ca |
> cakrākāraṃ tato bāhyaṃ vajrasūtradvayaṃ punaḥ || 227
> 
> aiśānyāṃ cakravāḍaṃ ca svānupūrvyā pradakṣiṇāt |
> sūtreṇa sūtrayet prājñaḥ sarvadiksamatāṃ vahan || 228
> 
> animittair asiddhiḥ syāt sūtracchede guroḥ kṣayaḥ |
> hīnābhiriktato rogā diṅmohe śiṣyavibhramaḥ || 229
> 
> caturasraṃ caturdvāraṃ catustoraṇabhūṣitam |
> catuḥsūtrasamāyuktaṃ paṭṭasragdāmabhūṣitam || 230
> 
> koṇabhāgeṣu sarveṣu dvāraniryūhasandhiṣu |
> khacitaṃ vajraratnais tu sūtrayed bāhyamaṇḍalam || 231
> 
> tasyābhyantarataś cakram aṣṭamaṇḍalakopamam |
> ardhena bāhyacakrasya samantāt parimaṇḍalam || 232
> 
> cakrastambhādyaracitaṃ vajrāvalyāvṛtaṃ śubham |
> vibhajec ca tato dvāraṃ hrīḥkārakrodhadṛṣṭitaḥ || 233
> 
> cakrāṣṭabhāgikaṃ dvāraṃ vedikārahitaṃ matam |
> dvārapramāṇā niryūhā devatāpaṭṭikās tathā || 234
> 
> dvārārdhā sarvato vedī kapolaḥ pakṣakas tathā |
> harārdhahāracandrārkā paṭṭasragdāmapaṭṭikāḥ || 235
> 
> rajobhūmis tadardhena mūlasūtrabhuvo bahiḥ |
> cakrādyastambhasūtrāṇāṃ bhūmis tulyā rajobhuvā || 236
> 
> toraṇaṃ triguṇaṃ dvārāt patākāghaṇṭayānvitam |
> saghaṇṭā mārutoddhūṭā patākā bāhyakoṇataḥ || 237
> 
> cakrānurūpato 'nyeṣāṃ yathāśobhaṃ prakalpanā |
> saṃbuddhajñānakāyatvād vāgmī vajrakule smṛtaḥ || 238
> 
> dharmakāyātmasaṃśuddhau cittamaṇḍalam asya tu |
> sattvāśayaṃ samāsādya mānādiniyamaḥ kṛtaḥ |
> prajñopāyodbhavā siddhir jātyādiniyamena kim || 239
> 
> tad ekahastam ārabhya yāvad dhastasahasrakam |
> evam āsūtrya tac cakraṃ dīptadṛṣṭyā rajāṃsi tu |
> prākkramajñānasaddīptyā samuttejyābhimantrayet || 240
> 
> oṃ vajracitra samaya hūm ||
> 
> dharmadhātur ayaṃ śuddhaḥ sattvadhātupramocakaḥ |
> svayaṃ mañjuravo rājā sarvatathāgatālayaḥ || 241
> 
> sarvadoṣavinirmuktaś cakrābhyantarasaṃsthitaḥ |
> aiśānīṃ diśam āśritya gurur vāmena muṣṭinā || 242
> 
> śvetaṃ pītaṃ tathā raktaṃ haritaṃ kṛṣṇam eva ca |
> samapradakṣiṇācchinnāvakrāṃ rekhāṃ prapātayet || 243
> 
> samāṃ ca pātayed rekhāṃ dvāraviṃśatibhāgikām |
> sthūlapāte bhaved vyādhiḥ kṛśayā dhananāśanam ||244
> 
> vidveṣo vakrayā mṛtyuś chinnayā guruśiṣyayoḥ |
> apradakṣiṇapāte tu rajasāṃ kīlanaṃ bhavet || 245
> 
> śvetavajramayī sūcī sauvarṇālambanāparā |
> padmarāgamayī sūcī tathā marakatāparā || 246
> 
> kṛṣṇābhyantarato jñeyā eṣa raṅgakramo 'sya tu |
> pūrveṇa tu mahāśvetaṃ dakṣiṇe pītasaṃyutam || 247
> 
> lohitaṃ paścimabhāgaṃ mañjiṣṭhottarasaṃyutam |
> madhyato bhūmibhāgaṃ tu indranīlaprabhāsvaram || 248
> 
> prajñopāyātmako nityaṃ saṃlikhet susamāhitaḥ |
> yavamātrāntarā rekhā pātanīya parasparam || 249
> 
> kuṇḍalāmṛtavajreṇa sarvaduṣṭān pramardayan |
> mahāmudrāsya damṣṭroktā duṣṭaśatruś ca mantrarāḍ || 250
> 
> namaḥ samantakāyavākcittavajrāṇāṃ namo vajrakrodhāya mahādaṃṣṭrotkaṭabhairavāya asimuṣalaparśupāśahastāya oṃ amṛtakuṇḍali kha 2 khāhi 2 tiṣṭha 2 bandha 2 hana 2 daha 2 garja 2 visphoṭaya 2 sarvavighnavināyakān mahāgaṇapatijīvitāntakarāya hūṃ phaṭ ||
> 
> evaṃ maṇḍalam ālikhya candrasūryakṛtāsanam |
> madhye khaḍgaṃ likhet syāmaṃ suviśuddhādibhāsvaram || 251
> 
> pūrveṇāṣṭārasaccakram ādarśādisamujjvalam |
> savye ratnaṃ harītābhaṃ navāṃśaṃ samatonnatam || 252
> 
> paścime 'ṣṭadalaṃ padmaṃ pratyavekṣādiraktakam |
> uttare tu satkhaḍgaṃ kṛtyādipratimaṇḍitam || 253
> 
> upāyair netram āgneyyāṃ nairṛtyāṃ vajram arthanāt |
> vāyavyāṃ vikaṭāsyaṃ tu balāt padmaṃ sakandakam || 254
> 
> aiśānyām utpalaṃ jñānāt pītaṃ nīlābhaśobhanam |
> āgneyādicatuṣkoṇe pūrvadvāradvipārśvayoḥ || 255
> 
> darpaṇaṃ ca tathā vīṇāṃ gandhaśaṅkharaśāyanam |
> vastraṃ dharmodayaṃ caiva dānaśīlādiśodhitam || 256
> 
> śraddhādimudgaraṃ daṇḍaṃ padmaṃ vajraṃ caturthakam |
> dvāreṣu sarvathā jñātvā sphuṭaṃ dhyātvā svacakrakam || 257
> 
> prāgvat prajñāṅgasaṃyogād buddhān svāntar niveśya ca |
> saccittena viyad vyāpya cakrapārśvakṛtāspadān || 258
> 
> taiḥ samāyātavighnāṃs tān samutsāryābhirakṣya ca |
> yamāryādibhir ākṛṣyāveśya baddhvā vaśaṃ nayet || 259
> 
> cakṣuḥkāyādy adhiṣṭhāyārghābhiṣekābhipūjanam |
> kṛtvā stutvātha saṃprīṇya japtvā vibhāvya toṣayet || 260
> 
> prāgvat satpadmabhāṇḍe tu kṛtvā jñānāmṛtāmṛtam |
> dikpālān svasvayogasthān prapūjya maṇḍalaṃ viśet || 261
> 
> trailokyavijayo bhūtvā yathāptyābharaṇāmbaraḥ |
> kṛtapradakṣiṇaś cakraṃ natvā homena pūrayet || 262
> 
> caturaṅgulam ātyajya tanmānābjapraphullayā |
> vedyā hastārdhahastādhaś cakravat sārvakarmikam || 263
> 
> dairghād ucchrayataḥ khaḍgaṃ aṣṭaikāṅgulamānakam |
> kuṇḍamadhye likhec cakraratnābjakhaḍgamadhyagam || 264
> 
> bahirveṣṭitavajrālīṃ yogī pūrvamukhasthitaḥ |
> japtvā sarvakṛtārakṣya vāme 'rghādy anyad anyat || 265
> 
> nyasyopakaraṇaṃ prokṣya mañjuvajrātmayogavān |
> kṣīravṛkṣendhanādīptam agniṃ tryakṣararecitam || 266
> 
> prajvālya vyañjanāghātaiḥ kuśān dadyāt pradakṣiṇam |
> ādyajahṛtsaratryaśrābjasthaṃ rūṃbījasaṃbhavam || 267
> 
> dhyātvā pītaṃ trivaktraṃ tu pīnaṃ prajñāngasaṅginam |
> kuṇḍikābhayadaṇḍākṣamālākaram ihānalam || 268
> 
> āvāhya jñānasadvahniṃ prāgvat tritattvaṭakkinā | abhyukṣaṇādikaṃ tasya kṛtvāsananiveśanam|| 269
> 
> sruksruve hastadaṇḍādho vajraratne tadūrdhvataḥ |
> caturasrāṅgulā pātrī dvyaṅgulakhātavajradhā || 270
> 
> caturaṅgulavajrāntar ante padmadalākṛtiḥ |
> antar vajrāṅgulaṃ khātaṃ dvyaṅgulābjadalaṃ sruvam || 271
> 
> dhyātvā svadaivataṃ bījaṃ pradīptaṃ sruksruvānane |
> dadyāt pūrṇāhutiṃ tasmai rephaṃ vinyasya tanmukhe || 272
> 
> juhvīta samidho dhanyāḥ samiddhe 'gnau ghṛtaṃ tilān |
> dūrvākhaṇdaṃ tu dadhyannaṃ kuśān vidhikramād ataḥ || 273
> 
> tathatājñānasadvahner hṛccandre maṃ-bhavādhipam |
> saccakraṃ juhuyād dhyātvā bāhyapūjādi pūrvakam || 274
> 
> oṃ agnaye svāhā || ghṛtasya ||
> 
> oṃ sarvapāpadahanavajrāya sarvapāpaṃ daha svāhā || tilānām ||
> 
> oṃ vajrāyuṣe svāhā || dūrvāyāḥ ||
> 
> oṃ vajrapuṣṭaye svāhā || akhaṇḍataṇḍulānām ||
> 
> oṃ sarvasampade svāhā || dadhyannasya ||
> 
> oṃ apratihatavajrāya svāhā || kuśānām ||
> 
> puṣṭiśāntivaśākarṣe dveṣoccāṭābhicāruke ||
> oṃ svāhā hoḥ jaḥ huṃ hūṃ phaṭ mantrānte cāpi codanā ||275
> hṛtsattvāt svādhipāt sarvāḥ prīṇyante devatā iti |
> dhyāyaṃś candrādikair anyair dravyaiḥ saṃtarpya pūrvavat || 276
> 
> hṛccandracakrasajjihvam ante pūrṇāhutiṃ tathā |
> abhyukṣya camanārghaṃ dattvāpūjya stutvā visarjayet || 277
> 
> śeṣaṃ havyaṃ svayogātmā vahnau hutvātha taṃ tathā |
> visarjya prāgvidhānena cakram āpūjya saṃviśet || 278
> 
> śiṣyapraveśavidhinā praviśyādau svayaṃ kṛtī |
> niṣpādya sekaparyantaṃ prāpyānujñāṃ kulādhipāt || 279
> 
> mahārāgodbhavaṃ tattvaṃ cakraṃ ca pratibimbavat |
> pure śiṣyapraveśārthaṃ tattvaṃ satyaṃ ca śrāvayet || 280
> 
> ākāśotpādacihnatvād anādinidhanaḥ paraḥ |
> mahāvajramayaḥ sattvo mañjuvajrādya siddha me || 281
> 
> sarvottamamahāsiddhi māhaiśvaryādhidaivata |
> sarvavajradharo rājā siddha me paramākṣara || 282
> 
> nirdoṣaḥ śāśvataś cāsi sarvarāgānurāgaṇa |
> tattvena siddha me bhagavan mahārāgo mahārata || 283
> 
> atyantaśuddha sarvāgra ādimuktas tathāgataḥ |
> samantabhadra sarvātmā bodhisattva prasiddha me || 284
> 
> sarvottamamahāsiddhi māhaiśvaryāgramudrayā |
> siddha vajra mahotkarṣāt vajragarvāpate mama || 285
> 
> sarvasattvamanovyāpī sarvasattvahṛdīsthitaḥ |
> sarvasattvapitā caiva kāmo 'gryaḥ samayāgriṇāṃ || 286
> 
> yena satyena sajjñānaṃ prajñopāyātmamaṇḍalaṃ |
> tena satyena me nātha kāmāṃs tvaṃ paripūraya || 287
> 
> pratibimbasamā dharmā acchāḥ śuddhā hy anāvilāḥ |
> agrāhyā anabhilāpyāś ca hetukarmasamudbhavāḥ || 288
> 
> tathatātattvaniryātā iti satyena maṇḍale |
> pratibimbaṃ sphuṭaṃ śiṣyāḥ sarve paśyantv akalmaṣāḥ || 289
> 
> sāmānyasaṃvaraṃ śiṣyaṃ prāgvat kāyādibhāsvaraṃ |
> jamanīkāntaraṃ prokta sarvakṛtkalaśāmbhasā || 290
> 
> raktāmbaraṃ tadāsyaṃ ca pṛcchet kas tvam iti priya |
> śiṣyeṇāpi tato vācyaṃ subhago 'ham iti priya || 291
> 
> saṃpūjya srakkaraṃ dvāri tathaivādattadakṣiṇam |
> yogacittaṃ samutpādya hṛdi vajraṃ hṛdā nyaset || 292
> 
> mantraḥ ||
> 
> oṃ sarvayogacittam utpādayāmi surate samayas tvaṃ hoḥ sidhya vajra yathāsukhaṃ |
> 
> adya tvaṃ sarvatathāgatādhiṣṭhito bhaviṣyasi |
> na ca tvayedam sarvatathāgataparamarahasyam amaṇḍalapraviṣṭāya vaktavyaṃ na cāśraddhātavyam iti vācyaṃ ||
> 
> yamāryādisvasanmantraiḥ samākṛṣya praveśya ca |
> pañcākṣarair athāpy evaṃ vācyaṃ satsaṃvaragrahe || 293
> 
> adya tvaṃ sarvatathāgatakule praviṣṭaḥ | tad ahaṃ te vajrajñānam utpādayāmi yena jñānena tvaṃ sarvatathāgatasiddhīr api prāpsyasi kim utānyāḥ siddhīḥ | na ca tvayādṛṣṭamaṇḍalasya purato vaktavyaṃ | mā te samayo vyathed iti tad dhṛdi vajram āsthāpya |
> 
> oṃ vajrasattvaḥ svayaṃ te 'dya hṛdaye samavasthitaḥ | nirbhidya tatkṣaṇaṃ yāyād yadi brūyā imaṃ nayam | 294
> 
> padmasthaṃ tryakṣarojjvalaṃ pāyayed amṛtaṃ pañca ||
> 
> idaṃ te nārakaṃ vāri samayātikramād dahet |
> samayarakṣaṇāt siddhiḥ piba vajrāmṛtodakam || 295
> 
> oṃ vajrodaka ṭhaḥ ||
> 
> dṛḍhapratijñam idaṃ vadet ||
> 
> adya prabhṛti tavāhaṃ vajrapāṇir yad ahaṃ brūyām idaṃ kuru tat tvayā kartavyaṃ na cāham avamantavyo mā te viṣamāparihāreṇa kālakriyāṃ kṛtvā narakapatanaṃ syāt | brūyād brūhi tataḥ śiṣyān sarvatathāgatāś cādhitiṣṭhantām vajrasattvo me āviśatu |
> 
> vācayitvā ca tad dhṛdi |
> 
> vajrāṅkakoṇamāhendre hūṃ dhyāyāt pīta-laṃ-bhave |
> vāruṇaṃ vaṃ-bhavaṃ śuklaṃ ghaṭāṅkaṃ parimaṇḍalam || 296
> 
> nīladhvajāṅkadhanvābhaṃ vāyavyaṃ yaṃ-bhavaṃ calam |
> kāye vāci tayor haḥ āḥ pādādho jhaiḥ samujjvalaṃ || 297
> vāyavye raṃ-bhava tryasreṇoddīpya śiṣyam āviśet || 298
> āveśaya stobhaya ra ra ra ra cālaya 2 hūṃ haḥ āḥ jhaiḥ ||
> 
> jihvāyāṃ raktam āḥ-kāraṃ dhyātvāviṣṭaṃ punar vadet |
> rāgavajraṃ tam ābhujya brūhi vajra śubhāśubham || 299
> 
> tam āveśaṃ dṛdhīkurvan tiṣṭha vajreti taṃ lapet | prakṣepayet srajaṃ cakre
> 
> pratīccha vajra hoḥ ||
> tāṃ śirasi bandhayet || 300
> pratighṛhṇa tvam imaṃ sattvaṃ mahābala ||
> 
> cihne cihnasamīpe vā srakprapannāprapannayoḥ |
> pated rucyāpi tadyogaṃ dadyād bhavyatayātha vā || 301
> 
> sajvālaṃ praṇavaṃ netre dhyatvā |
> 
> oṃ vajrasattva svayaṃ te 'dya cakṣūdghāṭanatatparaḥ |
> udghāṭayati sarvākṣo vajracakṣur anuttaram || 302
> 
> dhyātvā cakraṃ pradarśayet |
> 
> cakrādhipaṃ samārabhya yāvad amṛtakuṇḍalim |
> secayed ambunā mūrdhni vajrābhisiñca vāgbruvan || 303
> 
> secayen maulinā prāgvad dattvā cādhipadaivataṃ |
> hṛdi saṃgrāhya tad vajraṃ vajreṇāpy abhiṣecayet || 304
> 
> adyābhiṣiktas tvam asi buddhair vajrābhiṣekataḥ |
> idaṃ tat sarvabuddhatvaṃ gṛhṇa vajraṃ susiddhaye || 305
> 
> āliṅgya vajraghaṇṭābhyāṃ svādhipāt |
> 
> oṃ vajrādhipati tvām abhiṣiñcāmi tiṣṭha vajra samayas tvaṃ ||
> 
> mūrdhni nāmataḥ ||
> 
> oṃ vajrasattva tvām abhiṣiñcāmi vajranāmābhiṣekataḥ || he amukavajra ||
> 
> yad yad bhāti svasarvasvaṃ mukhyaṃ tan mañjurāṭ svayaṃ |
> dharmāḥ śuddhāḥ prakṛtyā yad buddhajñānacayaḥ sa hi || 306
> 
> svasyaiva cakravartitve śrīdhvanir nāmna āditaḥ |
> sarve sarvādhipatyāt tu vajrāntā he-niyojitāḥ || 307
> 
> abdhātuśuddhir akṣobhyo makuṭaḥ samatātmakaḥ |
> vajraṃ satpratyavekṣātmādhipaḥ kṛtyakaro 'rthadaḥ || 308
> 
> jñānaṃ vidyātra vajraṃ syād dhātur gotraṃ vaśī hy ataḥ |
> vratavyākaraṇāśvāsā vidyāseke 'pi nāmny mī || 309
> 
> idaṃ tat sarvabuddhatvaṃ vajrasattvakare sthitam |
> tvayāpi hi sadā dhāryaṃ vajrpāṇidṛḍhavratam || 310
> 
> oṃ sarvatathāgatasiddhivajrasamaye tiṣṭha eṣa tvāṃ dhārayāmi hīḥ hi hi hi hi hūṃ ||
> 
> sarvān vajravrataṃ dattvā vajraṃ tattvena grāhayet | anādinidhanaḥ sattvo vajrasattvo mahārataḥ | samantabhadra sarvātmā vajragarvāpatiḥ patiḥ | 311
> 
> ghaṇṭāṃ tattvena saṃgrāhya
> 
> iyaṃ sā sarvabuddhānāṃ prajñāghoṣānugā smṛtā | tvayāpi hi sadā dhāryā bodhir agrā jinair matā | 312
> tāṃ taddharmeṇa vādayet || 313
> svabhāvaśuddho hi bhavaḥ svabhāvair vibhavīkṛtaḥ |
> svabhāvaśuddhaiḥ satsattvaiḥ kriyate paramo bhavaḥ || 314
> 
> adhiṣṭhāya mahāmudrāṃ hṛdbhiḥ sevādikīrtitaiḥ |
> samayaiḥ kāmarūpādyair japen mantram avyaṅgataḥ || 315
> 
> svasaṃvedyasvabhāvais taiḥ sarvadiktryadhvasaṃsthitaiḥ |
> svādhidaivatayogena svaṃ parāṃś caiva pūjayet || 316
> 
> duṣkarair niyamais tair yat sevyamānair na siddhayaḥ |
> sidhyante 'ntardhyabhijñākhacārivākcittakāyajāḥ || 317
> 
> tasmād buddhāś ca satsattvā mantracaryāgracāriṇaḥ |
> prāptā dharmākṣaraṃ śreṣṭhaṃ sarvakāmopasevanaiḥ || 318
> 
> sevayan kāmaguṇān pañca sukhaduḥkhobhayātmakān |
> jñānārthī rāgiṇāṃ yogāt sādhayet sarvam eva hi || 319
> 
> kāyavākcittasaṃsiddher yāś cānyā hīnajāḥ smṛtāḥ |
> sidhyante mantrajāpāt tu kāyavākcittabhāvanaiḥ || 320
> 
> yaduktaṃ
> 
> vajraṃ tattvena saṃgṛhya ghaṇṭāṃ dharmeṇa vādya ca |
> samayena mahāmudrām adhiṣṭhāya hṛdā japed iti || 321
> 
> tat pratyuktam ||
> 
> gṛhītasamvaraṃ śiṣyaṃ tathaivādattadakṣiṇam |
> yācayed abhiṣekāya praṇamyaivaṃ tu gāthayā || 322
> 
> bodhivajreṇa buddhānāṃ yathā datto mahāmahaḥ |
> mamāpi trāṇanārthāya khavajrādya dadāhi me || 323
> 
> praveśadvārapīṭhasthāṣṭadalābjeṣṭayoginam |
> sarvadiktryadhvakhavyāpibuddhacakraiḥ svahṛdbhavaiḥ || 324
> 
> vādyagandhādyupetais taiḥ prāgvad vidyābhiṣekiṇam |
> mahāvajrābhiṣekeṇa secayed iti gāthayā || 325
> 
> abhiṣekaṃ mahāvajraṃ traidhātukanamaskṛtam |
> dadāmi sarvabuddhānāṃ triguhyālayasaṃbhavam || 326
> 
> dattvāvivartyasaṃsekaṃ cakratattvaṃ tu darśayet |
> caturasram avaiṣamyād buddhābuddhasamatvataḥ || 327
> 
> kāyavākcittadharmāṇāṃ nānaikatvādyayogataḥ |
> tatsmṛtis tatra yā śraddhā prāgdvāraṃ bodhaye matam || 328
> 
> bhūtabhāviviparyāsahānyanutpattaye tataḥ |
> abhūtotpannatathyasya cotpattisthitaye punaḥ || 329
> 
> arvāgdvāraṃ caturvīryaṃ chandotsāhasthitir matiḥ |
> paścimaṃ ṛddhipādās tu dvāraṃ tatsmṛtir atra tu || 330
> 
> śraddhāvīryasmṛtidhyānaprajñendriyabalātulam |
> samādhir uttaraṃ tv evaṃ caturdvāraṃ smṛtīndriyaiḥ || 331
> 
> prathamādicaturdhyānaiś catustoraṇavad bhavet |
> śūraṅgamakhagañjādisamādhir vedikāḥ smṛtāḥ || 332
> 
> vedyāṃ pūjākaravyagragranthādidhāriṇīcayaḥ |
> yac citrābharaṇaṃ tasmāt sarvāśāparipūraṇam || 333
> 
> vinayoddhūtasaddharmanavāṅgaravasarvagam |
> mārutoddhūtaviśvāgrapatākāghaṇṭanāditam || 334
> 
> jñāneṣv ādarśabodhyaṅgaiḥ sarvadikṣu prabhāsvaraiḥ |
> hārārdhahāracandrārkādarśasrakcāmarojjvalam || 335
> 
> cakraratnādisatstambhair vimokṣāṣtakaśodhitaiḥ |
> tasyābhyantarataś cakram aṣtamaṇḍalakopamam || 336
> 
> sarvadiktryadhvasambuddhavajrayānapravartanāt |
> vajrasūtraparikṣiptaṃ samantāt parimaṇḍalam || 337
> 
> raṅgāṇi pañcasaṃbuddhās tajjñānaiḥ sattvarañjanāt |
> indriyārthādisaṃśuddhyā svalakṣaṇavivekataḥ || 338
> 
> prāg yaj jñānāmṛtaṃ pītaṃ vajriṇāṃ kalaśaṃ tu tat |
> saṃbhārapūriniṣyandaḥ pūrṇakumbhaḥ kṛpārdrataḥ || 339
> 
> puṣpadhūpamahādīpagandhākhyaṃ yac ca maṇḍale |
> bodhyaṅgasumanohlādidharmolkā yaśasāṃ cayaḥ || 340
> 
> dharmāhāras tu naivedyaṃ hrīr apatrāpyasaṃvaraṃ |
> sugītanṛtyavāditramahāsukhavivardhanam || 341
> 
> puraṃ mokṣapuratvāc ca maṇḍalaṃ sārasaṃgrahāt |
> cakratattvaṃ samādarśya devatātattvam ādiśet || 342
> 
> śraddhāvīryasmṛtidhyānaśuddhyā saddvārirūpakam |
> kāyādau yogadhṛk cittaṃ prajñāśuddhyā sunirmalam || 343
> 
> dānādiṣaḍbahiḥśuddhyā rūpavajrādibhāvadhṛk |
> bhūpāyādyanimittatvāl locanādisvabhāvakam || 344
> 
> arthasattvātmasaṃkalpapravṛttijñānaśuddhitaḥ |
> ādarśādikṣayajñānaṃ sarvabuddhasvarūpakam || 345
> 
> jñānānutpādayogena cakreśākārabhāsvaram |
> rūpādibhramasaṃśuddhyā skandhāyatanadhātukam || 346
> 
> mātsaryādiparāvṛtteḥ paramābhūṣu susthiraṃ |
> svavipakṣaparāvṛttyā balādyavikalāmalam || 347
> 
> avikalpāt tu gāmbhīryam audāryaṃ svaparodayāt |
> gāmbhīryaudāryataś cetaḥ prajñopāyātmakaṃ matam || 348
> 
> pratyātmavedyadharmatvād bhedābhedādyasaṃsthitam |
> evaṃ prapañcite bhrāntiphalāḥ pāramītādayaḥ || 349
> 
> samayāgryā tato yogaṃ rūpābdaguṇayuktayā |
> kṛtvācāryo 'tra saṃviśya jñānāveśaṃ prakalpayet || 350
> 
> vajreṇa padmam āsphoṭya buddhān svāntar niveśya ca |
> sthirīkṛtya ca padmasthān prāpyānujñāṃ kulādhipāt || 351
> 
> svanāmoccārya vajrātmā spharayec cakrayogataḥ |
> vajrābjadhvanibhir buddhān ānīya cakrapārśvataḥ || 352
> 
> vighnān utsārya saṃrakṣya dattvārghaṃ pratipūjya ca |
> saṃstutya dvāribhir dvārakarma kṛtvātra sādhayet || 353
> 
> cakṣuḥkāyādyadhiṣṭhānasekapūjādikalpite |
> vijñāpayet sarvasattvārthaṃ kurudhvaṃ sarvasiddhaye || 354
> 
> cakraṃ saṃlikhya samyak prāk pratiṣṭhāyāṃ tv ayaṃ vidhiḥ |
> pratimāpustakādīnāṃ pauruṣāntas tu sekataḥ || 355
> 
> sakalārghavitānādi rakṣāhomādi yat smṛtam |
> tripañcākṣarasanmantrair mantrair vā prāk samuddhṛtaiḥ || 356
> 
> kārayitvā bahiḥ snānaṃ cakravartīva tat svayam |
> uttamaṃ tattvam etad dhi prajñopāyātmakaṃ tu yat || 357
> 
> jalamaulī tu niṣyandaḥ pāko vajrādhipāḥvakāḥ |
> saṃbuddhaiḥ pauruṣaḥ seko vaimalyo guhyayogataḥ || 358
> 
> tato rūpādisampannāṃ svabhyastacakrayoginīm |
> samayasaṃvarasthāṃ tāṃ cakre mudrām adhiṣṭhya ca || 359
> 
> munīndravṛndaṃ vajrāntaḥ samāveśya ca satsukham |
> prapīḍyānāmajyeṣṭhābhyāṃ śiṣyavaktre prapātayet || 360
> 
> śiṣyo dṛḍhamatiḥ sarvaṃ pibet vairocanātmanā |
> sa bhaved viśvavad viśvo 'trāho sukheti vāg bruvan || 361
> 
> prajñāsaṃparkataḥ śrīmān tattvaṃ samupalakṣayet |
> iyaṃ te dhāraṇī ramyā sevyā buddhaiḥ prakalpitā || 362
> 
> cakrakramaprayogeṇa samāsvādaya satsukham |
> vajraparyaṅkataś cittaṃ maṇyantargatam īkṣayan || 363
> 
> maṇḍalaṃ devatātattvam ācāryaparikarma ca |
> saṃkathya guhyaprajñābhyāṃ siktvā tattvaṃ samuddiśet || 364
> 
> yad āha ||
> 
> na tathā bodhicaryādyair anyair vāpi na yaiḥ śubhaiḥ |
> prāpyante sarvabuddhādyā yathābhiṣekād ito nayāt || 365
> 
> samayaṃ rakṣayed bhartuḥ saṃvaraṃ pālayet sadā |
> pañcamāṃsāmṛtaṃ bhakṣyaṃ rakṣo 'nyaḥ samayo 'py ataḥ || 366
> 
> ratnaghnaghātasarvastrīparasvādānaṃ vāṅ mṛṣā |
> etad dhi vidhivat rakṣyaṃ yogatantre ca yat smṛtam || 367
> 
> tatas tathāgato bhūtvā vyākuryād udgatayānayā |
> hṛnmuṣṭicīvarā vāmā dakṣiṇā tu varapradā || 368
> 
> oṃ esāhaṃ vyākaromi tvāṃ vajrasattvas tathāgataḥ |
> bhavadurgatitoddhṛtya atyantabhavasiddhaye || 369
> 
> he vajranāma tathāgata siddhaye bhūr bhūvaḥ svaḥ ||
> 
> vyākriyate 'nayā yas tu mantrī sarvajagatpatiḥ |
> bodhāv anuttarāyāṃ hi vyākuryāt sugatair api || 370
> 
> yathā yathā hi vinayaṃ sattvā yānti svabhāvataḥ |
> tathā tathā hi sattvārtham kuryād rāgādibhiḥ śuciḥ || 371
> 
> pratidinaṃ catuḥsandhyaṃ samādhitrayayogavān |
> bhūtvā sādhaya saṃsiddhiṃ sāmānyetarabhāvanīm || 372
> 
> antardhir dhātusāhasre dvisāhasreṣv abhijñakaḥ |
> vidyādharas trisāhasre vajrī sarvajagatpatiḥ || 373
> 
> śāntipuṣṭyādi yat karma tadanyad vā yad īpsitam |
> cakrānurāgayogena sādhayan sidhyate laghu || 374
> 
> tad uktam ||
> 
> vajrādhipatayaḥ sarve rāgatattvārthacintakāḥ |
> kurvanti rāgajāṃ bodhiṃ sarvasattvahitaiṣiniīṃ || 375
> 
> ato bodhyarthiko mantrī kāyavākcittaceṣṭitam |
> karma kuryād vidhānena sarvaṃ tad bodhaye matam || 376
> 
> yathā praviṣṭaśiṣyebhyo 'nuśaṃsārthibhya ity api |
> samāśvāsāṃ trisamayam ato dadyād vidhānataḥ || 377
> 
> dṛṣṭvā praviṣṭvā paramaṃ rahasyottamamaṇḍalam |
> sarvapāpair vinirmuktā bhavanto 'dyaiva susthitāḥ || 378
> 
> na bhūyo maraṇaṃ vo 'sti yānād asmān mahāsukhāt |
> adhṛṣyāś cāpy abaddhāś ca ramadhvam akutobhayāḥ || 379
> 
> nivṛttaṃ bhavaduḥkhaṃ vo 'tyantabhavaśuddhaye |
> saṃbhūtāḥ śāsinām agrā atyantabhavasiddhaye || 380
> 
> ayaṃ vaḥ satataṃ rakṣyaḥ siddhaḥ samayasaṃvaraḥ |
> sarvabuddhaiḥ samaṃ proktā ājñā paramaśāśvatī || 381
> 
> bodhicittaṃ na vai tyājyaṃ yad vajram iti mudrayā |
> yasyotpādanamātreṇa buddha eva na saṃśayaḥ || 382
> 
> saddharmo na pratikṣepyo na ca tyājyaḥ kadācana |
> ajñānād vātha mohād vā na vai vivṛṇuyāt sa tu || 383
> 
> svam ātmānaṃ parityājya tapobhir na ca pīḍayet |
> yathāsukhaṃ sukhaṃ dhāryaṃ saṃbuddho 'yam anāgataḥ || 384
> 
> vajraṃ ghaṇṭā ca mudrā ca na vai tyājyā kadācana |
> acāryo nāvamantavyaḥ sarvabuddhasamo hy asau || 385
> 
> yo vāvamanyetācāryaṃ sarvabuddhasamaṃ gurum |
> sarvabuddhāpamānena sa nityaṃ duḥkhaṃ āpnuyāt || 386
> 
> jvarair garair viṣair rogair ḍākinyupadravair grahaiḥ |
> vighnair vināyakair ghorair mārito narakaṃ vrajet || 387
> 
> tasmāt sarvaprayatnena vajrācāryaṃ mahāgurum |
> pracchannavarakalyāṇaṃ nāvamanyet kadācana || 388
> 
> anurūpaṃ ca te deyaṃ gurubhaktaṃ sadakṣiṇam |
> tato jvarādayas tāpā na bhūyaḥ prabhavanti hi || 389
> 
> nityaṃ svasamayaḥ sādhyo nityaṃ pūjyās tathāgatāḥ |
> nityaṃ ca gurave deyaṃ sarvabuddhasamo hy asau || 390
> taddānāt puṇyasaṃbhāraḥ saṃbhārād bodhir uttamā |286datte 'smai sarvabuddhebhyo dattaṃ bhavati śāśvatam || 391
> adya vaḥ saphalaṃ janma yad asmin supratiṣṭhitāḥ |
> samāḥ samayadevānāṃ bhavitā stha na saṃśayaḥ || 392
> 
> adyābhiṣiktā āyuṣmantaḥ sarvabuddhaiḥ savajribhiḥ | traidhātukamahārājyaṃ rājādhipatayaḥ sthirāḥ | 393
> 
> adya mārān vinirjitya praviṣṭāḥ paramaṃ puram |
> prāptam adyaiva buddhatvaṃ bhavadbhir nātra saṃśayaḥ || 394
> 
> iti kuruta manaḥ prasādavajraṃ svasamayam akṣayasaukhadaṃ bhajadhvam |
> jagati laghu sukhe 'dya vajrasattvapratisamaśāśvatatām gatā bhavantaḥ || 395
> 
> praṇipatya guroḥ padau śiṣyāḥ sadbhaktivatsalāḥ |
> brūyur evaṃ kariṣyāmo yathājñāpayase vibho || 396
> 
> saty eva saṃbhave teṣāṃ pratyekaṃ vāmapāṇinā |
> savyāṅguṣṭhakam āgṛhya śāntiṃ kuryād vidhānataḥ || 397
> 
> trisaptāhutim ekāṃ vā rājño vā bhūpater atha |
> dikpālasvātmaśāntau ca hutvā yāceta dakṣiṇām || 398
> 
> sarvasattvārthakarttavye śrutādau vā prati prati |
> bhūgajādisuvarṇādau svasiddhau vā sahāyatām || 399
> 
> saṃgṛhya yat tad utsṛṣṭaṃ saṃtoṣya dattadakṣiṇān |
> sarvāhāravihārais taiḥ svaparaiś cakram arcayet || 400
> 
> saṃgṛhya yogyasacchiṣyān vicitraparamāyubhiḥ |
> saṃtarpya copasaṃhṛtya muḥ-kārāntaiś ca tryakṣaraiḥ || 401
> 
> ākāretyādimantreṇa śūnyaṃ tac cakram uttamam |
> dattvārthine rajaḥ stokaṃ mahat toye rajaḥ sṛjet || 402
> 
> garttāpūre pratiṣṭhāyāṃ home cakre ca yad dhanam |
> ācāryasyaiva tat sarvam ity āha varavajradhṛk || 403
> 
> ityādikarmikasyāyam uktaś cakravidhiḥ sphuṭaḥ |
> jñānāveśasulabdhasya tv āveśenaiva kathyate || 404
> 
> dvādaśābde samāveśya saṃpūjya bālabālike |
> tābhyāṃ yad racayec cakraṃ cittavākkāyikaṃ matam || 405
> 
> citte tv akṣobhyamāmakyor ādeśaḥ samudāhṛtaḥ |
> pāṇḍarāmitayor vāci kāye śāśvatalocane || 406
> 
> cittavākkāyasaṃstobhād racanāt tv iyam adbhutā |
> cittastobhāt parijñānaṃ vākstobhān mantrabhāṣaṇam || 407
> 
> kāyastobhāc ca khesthānaṃ stobhāveśe vidhis tv ayam |
> ācāryaśiṣyaseko 'tra prāṅnyāyenaiva saṃsthitaḥ || 408
> 
> prāptajñānavaśīkuryāc cetasaiva tricakrakam |
> tadadhiṣṭhānataś cakraṃ dṛśyate svaparair yataḥ || 409
> 
> praveśo 'trābhyanujñataḥ spaṣṭasvapnavad iṣyate |
> yatas tenottamo jñeyaś cittamūrtidṛḍhatvataḥ || 410
> 
> triyogānām api prāgvad vidhir vākkāyacakrayoḥ |
> tatsthāne 'kṣobhyacihnaṃ syād vākkāyaguhyaśuddhaye || 411
> 
> jñānādikarmisaṃveśisaṃprāptavaśinām api |
> cetasaiva vidhiḥ sarvas taddhīno naiva sidhyati || 412
> 
> vajrācāryāgraśiṣyāṇāṃ niṣyandādiratātmanām |
> manasokto vidhiḥ śreṣṭho vāṅmātreṇātra kiṃ bhavet || 413
> 
> vṛttamātrān na buddhatvaṃ śrutamātrāc ca no bhavet |
> cintayāpi na yāvac ca bhāvanāto nirucyate || 413
> 
> yad āha ||
> 
> alaṃ bahuvisarpiṇyā kathayā mantravādinām |
> cetaḥ sādhyaṃ viśeṣeṇa cittāt saṃbodhisambhavaḥ || 414
> 
> yad uktam ||
> 
> yat phalaṃ bodhicittaṃ tad buddhajñānam anuttaram |
> vajrasattvamayaṃ tasya dharmasaṃbhoganirmitam || 415
> 
> prākṛtakalpanāvṛtter nānyad duḥkhaṃ bhavātmakam | sākṣād asya virodhy evaṃ prajñopāyātma [...] 416
>
> — *Dīpaṃkarabhadra: Guhyasamājamaṇḍalavidhi (Academic edition — see source file header)*